Ef ísinn á einhvers staðar heima á Íslandi þá er það í Hveragerði. Í meira en hálfa öld hefur Kjörís framleitt þar ís sem mörgum finnst sá besti á Íslandi og þótt víða væri leitað. Fjölmargir þeirra sem eldri eru minnast þess ennþá að fara í ísrúnt til Hveragerðis og með þessari nýju ísbúð getum við vonandi endurvakið þann sið. Ísinn sem er á boðstólum hjá Bongó kemur allur frá Kjörís, sem hafa unnið með okkur að ýmsum nýjum útfærslum en einnig rifjað upp eldri uppskriftir. Við erum þakklátir Kjörís fyrir samstarfið og þolinmæðina.

​

Okkur langaði til að skapa lítinn heim þar sem ís-elskendur gætu sest niður og notið þess að borða góðan ís í fallegu umhverfi. Því miður býður íslenska veðráttan ekki oft upp á það að geta setið úti með svalandi ís ... en hjá okkur er alltaf bongó-blíða! Grunnhugmyndin á bakvið hönnunina var að búa til klassíska íbúð þar sem nostalgía og frönsk kaffihúsa stemmning svifi yfir vötnum. Við vonum að gestir okkar gleymi aðeins stund og stað og fari í smá ferðalag aftur í tímann með okkur.

​

Rut og Kristinn